На Инфективната клиника во Скопје е згрижен пациент со потврдена маларија, објави телевизијата „24“, а според информациите, човекот бил на патување на африканскиот остров Занзибар, кој последниве години стана популарна дестинација за дел од туристите од Македонија.

Тој пројавил симптоми на висока температура и имал треска, по што веднаш се јавил на клиниката каде е задржан на болничко лекување.

„Поради тоа што престојувал на тоа место директно се јавил на инфективната клиника, по прегледот и иследувањата од страна на дежурниот лекар потврдена е маларија – моментално е стабилен, нормално дека има епизоди на треска, но доброто е што навреме се јавил и очекуваме текот на лекувањето да биде успешен“, вели директорот на Инфективна, д-р Фадиљ Цана.

Тој додава дека болестите карактеристични за тропските предели очекувано се јавуваат во летната сезона, кога многу луѓе патуваат.

„Имајќи предвид дека сега е летна сезона и тоа се вообичаени болести, особено во современиот свет во кој сега доста се патува и во тропски подрачја, треба да се има предвид: ако пројават температура, треска, општа омалаксаност, веднаш треба да се јават на лекар за да се провери дали е поврзано со престојот или е можеби друго заболување и навреме да се дијагностицира. За сите овие заболувања, ако навреме се оди на лекар, исходот би требало да е позитивен“, вели д-р Цана.

Двајцата пациенти кај кои претходно беше потврдена западнонилска треска и натаму се лекуваат на Клиниката. Тие, според лекарите, се во добра состојба и наскоро ќе бидат пуштени дома.