Во време на коронакриза се подготвува Лигата на богатите
Англискиот таблоид „Сан“ тврди дека е се поблиску до реализација на затворена Лига на богатите.
Пандемијата на коронавирусот им носи огромни загуби на фудбалските екипи и поради тоа повторно се подгреаја шпекулациите дека најголемите европски клубови планираат конечно да го реализираат проектот, затворена Лига на богатите.
– Фудбалот во Европа се наоѓа пред големи промени. Лигите и клубовите го достигнаа максимумот за ТВ правата, приходите од натпреварите, спонзорствата и маркетингот во своите лиги. Поради тоа, не постои подобар момент од актуелниот за да го направат следниот потег. Да се формира толку озборуваната затворена Лига. Фудбалот се менува, и дали вие мислите дека сопствениците се грижат за традицијата на постоечките натпреварувања или за парите и приходите – вели инсајдер за „Сан“.
Едни од најголеми заговорници на вакво натпреварување се екипите како Јувентус, Баерн Минхен и ПСЖ, а интересно е што челниците на најголемите клубови планирааат да поканат во Лигата да се натпреваруваат и не толку финансиски моќни екипи.
Тоа се екипи кои имаат голема база на навивачи, како што се Селтик, Ајакс, Галатасарај и единствениот клуб од овие простори кој има шанса да се најде во вакво натпреварување е Црвена звезда.
Засега пречка кон реализацијата на овој проект се ФИФА и УЕФА кои претходно се заканија со судски постапки доколку се започне со формирање на ново натпреварување каде најсилните екипи ќе играат помеѓу себе.