Грчката полиција воведе засилени безбедносни мерки во Атина пред почетокот на завршниот турнир во Евролигата, со цел да се спречат евентуални инциденти и нарушување на јавниот ред.

Според одлуката на безбедносните служби, забранети се сите јавни собири на отворено, како и организирани навивачки колони со автомобили и мотори во централното градско подрачје.

Мерките стапија на сила од денеска од 6 часот наутро и ќе важат до понеделник, 25 мај, во истиот термин. Забраната ќе се однесува на строго определен безбедносен појас во центарот на Атина.

Од грчката полиција посочуваат дека поради големиот број навивачи кои се очекуваат во градот, секое масовно собирање или неконтролирано движење на навивачки групи би можело да предизвика судири на улиците и сериозен сообраќаен хаос. Поради тоа, надлежните оцениле дека поблаги мерки не би биле доволни за нормално функционирање на главниот град и зачувување на безбедноста.

Фајнал-фор турнирот започнува во петок со полуфиналните натпревари, во кои ќе се соочат Реал Мадрид и Валенсија, односно Олимпијакос и Фенербахче. Натпреварите ќе се играат во арената „ОАКА“ во Атина.