Внукот на поранешниот американски претседател Џон Ф. Кенеди, Џек Шлосберг, повторно остро реагираше на серијата „Љубовна приказна: Џон Ф. Кенеди Помладиот и Керолин Бисет“, чиј креатор е Рајан Марфи.

Серијата ја следи љубовната приказна на Џон Ф. Кенеди Помладиот и Керолин Бисет – Кенеди, кои трагично загинаа во авионска несреќа во 1999 година. Џек Шлосберг е син на сестрата на Џон Кенеди Помладиот, Керолајн Кенеди, и Едвин Шлосберг.

Во интервју за утринската прогама на Си-би-ес, Шлосберг изјави дека серијата претставува фикција и дека продуцентот „нема поим за што зборува“.

„Ако сакате да слушнете некого што никогаш не запознал член од моето семејство и не знае ништо за нас – прашајте го Рајан Марфи. Би сакал гледачите да ја гледаат серијата со една буква на ум – големо ‘Ф’ за фикција“, рече тој.

Тој предложи дел од заработката од проектот да биде донирана во Претседателската библиотека и музеј „Џон Ф. Кенеди“, институција посветена на наследството на Џон Ф. Кенеди.

Да потсетиме, Рајан Марфи претходно изјави дека не бил подготвен за реакцијата од семејството Кенеди, нагласувајќи дека серијата е „љубовна приказна, а не напад“. Тој додаде дека ниту еден филм или серија за Кенеди никогаш не биле официјално одобрени од семејството.

Извршните продуценти истакнаа дека проектот е направен со почит кон вистинската трагедија, иако признаа дека немале директна комуникација со семејството.

Финалето на серијата е закажано за 26 март.

Американската бајка со трагичен крај: Љубовната приказна на Џон Кенеди Помладиот и Керолин Бисет