Ракела Мусолини, внука на италијанскиот фашистички диктатор Бенито Мусолини, освои најмногу гласови на изборите за градскиот совет во Рим, покажале официјалните резултати, пишува Си-Ен-Ен.

Застапувајќи ги „Браќата на Италија“ (Fratelli d’Italia), што доаѓа од неофашистичката конзервативна партија на Италијанското социјално движење, Мусолини доби 8.264 гласови, Во интервју за весникот „Ла Република“ во средата, Мусолини рече дека верува дека гласачите помалку се фокусирале на нејзиното презиме и повеќе на „иницијативите“ што ги започна за време на нејзиниот мандат во градскиот совет.

„На училиште покажуваа со прст кон мене, но потоа се појави Ракела и лицето преовлада над презимето, без разлика колку беше оптоварувачко тоа име“, рече внуката на Мусолини.

Запрашана за нејзините ставови за фашизмот, Ракела одговори за италијански весник: „За да се занимаваме со оваа тема, ќе треба да разговараме до утре наутро“.

Ракела Мусолини не е првиот потомок на италијански диктатор кој влегол во политиката. Нејзината полусестра Алесандра Мусолини беше пратеник во централно-десничарската Народна партија на слободата (Il Popolo della Libertà) на Силвио Берлускони, а исто така беше и пратеник во Европскиот парламент.