Во општината Улцињ во Црна Гора се воведени нови правила со кои се забранува движење во костим за капење или без дел од облека на јавни површини надвор од зоните за капење. За прекршителите е предвидена парична казна од 150 до 500 евра, пишува „Вијести“.

Во Одлуката за комунален ред се наведува дека новите правила се воведуваат со цел заштита на комуналниот ред, достоинството на градот и уредениот изглед на јавните површини. Лице кое ќе биде затекнато во костим за капење или без дел од облека надвор од зоната за капење ќе биде казнето од 150 до 500 евра.

Тоа стои во Одлуката за дополнување на Одлуката за комунален ред, која е усвоена на седница на улцинскиот парламент во четвртокот минатата недела.

„Заради заштита на комуналниот ред, достоинството на градот и уредениот изглед на јавните површини, забрането е движење во костим за капење или без дел од облека на јавните површини во населби со градски карактер, приградски населби и туристички локации на територијата на општина Улцињ, освен во зоните за капење – плажи и непосредниот крајбрежен појас наменет за капење. Одредбата од став 1 особено се однесува на улици, плоштади, шеталишта, пешачки зони, паркови и други јавни површини кои не се одредени како зони за капење“, стои во новиот член од усвоената одлука.

Со вториот член од одлуката е прецизирано дека за овој прекршок лицето ќе биде казнето со парична казна од 150 до 500 евра.