Корисници на апликацијата за пораки „Вајбер“ во Македонија деновиве пријавуваат зголемен број на обиди за измамнички напади, насочени кон крадење на личните податоци и пристапот до кориснички профили.

​Според медиумите, најчесто се работи за два метода со кои измамниците се обидуваат да стигнат со целите. Првиот се повиците на „Вајбер“ од броеви што почнуваат со +1, телефонскиот повикувачки број за Соединетите Американски Држави. Иако го имаат префиксот +1, повиците всушност доаѓаат од целиот свет. Ако одговорите на повикот, може да ви бидат наплатени високи сметки или да бидете пренасочени на лажни страници. Најдобар начин да се заштитите е едноставно да не се јавувате на непознати броеви, особено ако се со странски префикси.

​Вториот, многу посуптилен напад, доаѓа во форма на лажна порака на „Вајбер“ со следнава содржина:
​„Онлајн корисник
Viber корисник
За жал, добивме извештаи дека вашата сметка е украдена.
Корисник 2: +
За да ја потврдите сопственоста, испративме верификациски код на вашиот број преку SMS. Проверете ја вашата SMS порака и внесете го кодот овде.
​Доколку не ја потврдите сопственоста на вашата сметка, таа ќе биде означена како украдена и вашата сметка ќе биде трајно избришана од Вибер за да се заштитат информациите на оригиналниот сопственик.“

​Оваа порака е класичен пример за т.н. „фишинг“-напад. Хакерите се обидуваат да ве измамат да го внесете верификацискиот код што ви го испраќа „Вајбер“ преку СМС. Со тоа, тие добиваат пристап до вашата сметка и можат да ја преземат контролата врз неа.Поради ова, никогаш не споделувајте верификациски кодови со никого, без разлика кој тврди дека е. Кодот е наменет само за вас и служи за потврда на вашиот идентитет при логирање.

​За да ги избегнете овие напади, следете ги овие едноставни чекори:

​- Не се јавувајте на непознати броеви со странски префикси.

​- Игнорирајте пораки што бараат од вас да внесете верификациски код.

​- Вклучете ја двостепената верификација во поставките на Вибер. Со оваа опција, дури и ако некој го добие вашиот код, нема да може да пристапи до вашата сметка без дополнителна лозинка.

​- Пријавете ги сомнителните контакти и пораки до Вибер за да помогнете во борбата против ваквите измами.

​- Бидете внимателни и заштитете ги своите лични податоци и сметки