„Македонија нема, не планира и не преговара за отворање мигрантски кампови“, соопшти денеска владејачката ВМРО-ДПМНЕ, откако британски „Тајмс“ објави дека македонската влада влегла во формални разговори со Велика Британија околу прифаќањето мигранти, односно баратели на азил на кои им е одбиено барањето во Обединетото Кралство.

На објавената вест претходно реагираше СДСМ, која го обвини премиерот Христијан Мицкоски за „најголемо предавство во историјата“. Одговорот на ВМРО-ДПМНЕ е насочен кон опозициската партија.

Според ВМРО-ДПМНЕ, ова обвинување „е уште една лага од фабриката на СДСМ, партија пред „само неколку години молчеше пред најголемиот мигрантски бран и ја претвори државата во транзитна зона без контрола“.

Социјалдемократите денеска го изнесоа тоа обвинување врз основа на информации што ги објавија дел од британските медиуми, според кои, „Владата на Христијан Мицкоски официјално преговара со Велика Британија за депортирање одбиени баратели на азил во Северна Македонија“.

Од ВМРО-ДПМНЕ понатаму велат дека СДСМ „кога нема аргументи, кога фактите им се против нив, бега во фантазии и хорор-сценарија“.

-Криминалците за да се спасат од одговорност се подготвени да измислат колонизација на марсовци во Македонија само за да создадат паника кај народот. Но колку и да шират страв, вистината останува: Македонија денес е безбедна, стабилна и водена од одговорна Влада, а не од луѓе кои политиката ја разбираат како фабрика за лаги и криминално богатење – се наведува во реакцијата од ВМРО-ДПМНЕ.

Николоски во Лондон го потпиша најголемото задолжување во независна Македонија