Мигранти од Африка и Азија кои барале, но не добиле азил во Велика Британија, би можеле да бидат депортирани во Македонија, според новиот план за намалување на преминувањата на мигранти преку каналот Ламанш. Според „Тајмс“, чија сторија ја пренесоа и други медиуми од Островот, македонската влада веќе преговара со британските за модалитетите со кои ова би се извело.

Македонија влегла во формални разговори со Велика Британија за организирање на „центар за враќање“ на мигранти наесен, според лондонскиот весник. Според предлогот, Велика Британија би ѝ плаќала на Македонија за секој мигрант што ќе го прифати, покрај инвестирањето во земјата и помагањето во нејзината безбедност од Русија.

Ова доаѓа откако македонската и британската влада во мај потпишаа „стратешки договор“ за инвестиции и кредити во вкупен потенцијален износ од шест милијарди евра од британските комерцијални банки. Владата го претстави договорот како „историски“, а сомневањата дека дел од него може да биде и обврската за прифаќање мигранти, ги негираше.

Николоски во Лондон го потпиша најголемото задолжување во независна Македонија

Според „шемата“ што сега ја открива „Тајмс“, мигрантите кои би дошле во Македонија потоа би имале можност да побараат азил во нашата земја или да добијат работни визи за ангажман во сектори во кои има недостиг на работна сила. Тие, според планот, нема да бидат притворени и би имале можност да заминат кога сакаат.

Британските власти веќе беа под силни критики за сличен откриен план за Руанда, а во изминатата година како можни дестинации за мигрантите одбиени во Британија се споменуваа и Косово и Босна и Херцеговина.