ВМРО-ДПМНЕ „извади“ документи од Централен регистар на Хонг Конг: „Стабри Интернешнл“ е фантом-фирма за провизии при набавка на кинески вакцини
Опозициската ВМРО-ДПМНЕ претпладнево одржа прес-конференција чиј домаќин беше пратеникот Миле Лефков и на која беа извадени материјали од Централниот регистар на Хонг Конг. Документите, како што тврдат од опозицијата, упатуваат на фирма-фантом „Стабри Интернешнл“ која била регистрирана на 22 септември во 2017 година, три месеци по формирање на македонската влада, и која, вели Лефков, „требала да служи за провизии при набавката на кинески вакцини“.
– На фантом-фирмата „Стабри Интернешенл“, според нашите документи, се префрлени 12,5 милиона долари за 200.000 вакцини, односно Заев и Филипче на оваа фирма и платиле 100 отсто повисока цена од највисоката цена за која се продавани кинеските вакцини. Имено додека цел свет купува кинески вакцини за максимум 30 долари, Заев и Филипче платиле 62,5 евра. Или што би се рекло на струмички 30 за „Синофарм“, 30 за Вицето, обвинуваат од ВМРО-ДПМНЕ.
Од опозицијата прашуваат „како „Стабри Интернешенл“, фирма која има само тројца вработени, како што се потврдува од документите, успева да го убеди Филипче дека ќе набави кинески вакцини, кое е портфолиото на фирмата и дали тој ја истражил истата пред да стапи во соработка?!“
– Од документите кои ги имаме, се гледа дека фирмата е формирана со само 10.000 хонгконшки долари основен капитал, односно 1.000 евра. За јавноста да сфати, ова е единствената гаранција која истата ја има и е јавно достапна, а е депонирана како основачки капитал. Според информациите од Централниот регистар истата нема други средства, нагласи Лефков на прес-конференцијата.
Притоа Лефков, во име на опозициската партија, потенцира оти очекува од Јавното Обвинителство да ги земе во предвид сите документи и информации објавени во медиумите, како и овие денес, и веднаш да отвори истрага за случајот.