ВИДЕОИНТЕРВЈУ | Ќушкоски: Луѓе завршуваа во затвор поради учество на Вевчански карневал
Најстарата зачувана фотографија од Вевчански карневал е направена по завршувањето на Првата светска војна, поточно во 1919 година, вели во ексклузивно интервју за „Слободен печат“, вевчанецот Анастас Ќушкоски (84), реномиран драмски писател, уметник, хроничар и пасиониран фотограф.
Ќушкоски низ годините од минатиот век, па сè до денес направил преку 20.000 фотографии од Вевчанскиот карневал.
Препорачано
Тој сведочи за многу немили настани и премрежја кои ги поминале вевчанци поради овој настан.
-Ова е многу стар настан, за кој јас не претпочитам да се нарекува карневал, бидејќи е обичај. Карневалот како карневал има друго значење, но нејсе, станува збор за традиција која низ годините претрпе многу премрежја. Во 50-те години на минатиот век многупати се соочувавме со забрани да се одржува оваа традиција. Тогаш многу луѓе лежеа и затвор затоа што биле маскирани, под образложение „се вознемирувало населението“. Ние вевчанци сме отпорни и покрај многуте забрани останавме истрајни до денес – вели Ќушкоски.
Нашиот соговорник се присетува и на тоа дека имало критични времиња кога децата го спасувале карневалот.
-Имаше години кога притисоците беа силни, па за да се одржи традицијата, бидејќи на возрасните им беше забрането да се маскираат, се пресоблекуваа само децата. Властите не можеа на децата да им ја ускратат забавата. Така тогаш го оживувавме Вевчанскиот карневал – рече тој.
Политичките маски, тренд од 80-те
И маските добиваат своја еволуција, од столетие во столетие креативноста се менува, инспирацијата добива поинаков акцент.
-Во минатото василичарите создавале маски од природни материјали, коски, кожа, трева, природа, во современи услови креативноста преминува во поинаква димензија. Денес ќе сретнете софистицирани креации, модерни маски, а некаде пред 30 години се појавуваат и политичките маски кои ја отсликуваат моменталната политичка состојба низ сатира – објаснува тој.
Со Ќушкоски правиме ретроспектива на Вевчанскиот карневал, а тој во разговорот со нас споделува не толку познати фасцинантни факти и моменти. Погледнете го целиот разговор на јутјуб-каналот на „Слободен печат“.
