ВИДЕО: Зидан е доктор за ЛШ, неговиот Реал носи два гола предност во Ливерпул
Фудбалерите на Реал Мадрид славеа со 3:1 против Ливепрул во првиот четвртфинален натпревар во Лигата на шампионите.
Двоен стрелец на Реал беше Винисиус Жуниор, а во листата на стрелци се запиша и Марко Асенсио, додека голот за Ливерпул го постигна Мохамед Салах.
Реал Мадрид во целост го надигра Ливерпул, посебно во првото полувреме во кое имаше предност од 2:0, а Зинедин Зидан уште еднаш покажа дека е доктор за Лигата на шампионите.
Иако не можеше да смета на стоперите Рамос и Варан, напаѓачите на Ливерпул во првото полувреме не упатија ниту еден шут во рамките на голот на Куртоа. Тактичката надмоќ на теренот, на „кралевите“ им донесе три гола, првиот во 27. минута беше дело на Винисиус, а девет минути подоцна Асенсио ја искористи катастрофалната грешка на Трент Александер-Арнолд и зголеми на 2:0.
Во второто полувреме, Салах внесе неизвесност во голот во 51. Минута, но одговорот на Реал дојде 14. минути подоцна кога Винисиус го постави конечниот резултат.
Реваншот е закажан за 14. април на „Енфилд“ каде Реал носи два гола предност.
Во вториот натпревар, Манчестер сити со 2:1 ја совлада Борусија Дортмунд.
„Граѓаните“ ја искористија првата шанса, по грешката на Џан на средина на теренот, Кевин де Брујне повлече контра и по двојното додавање со Марез, го отвори резултатот.
Во финишот од натпреварот, во 84. минута, Борусија Дортмунд преку Марко Ројс успеа да израмни, но во последната минута Фил Фоден му донесе триумф на Манчестер сити.