Љубителите на карневалот во Рио де Жанеиро веќе уживаат во преткарневалската атмосфера, која ги преплави улиците на неколку населби во бразилската метропола. Илјадници граѓани, облечени во шарени маици и традиционална бахијанска облека, со насмевки и добра енергија танцуваа во ритамот на тапаните.

Веселбите се одвиваа во рамки на уличната парада на групата „Sovaco do Cristo“, една од најпознатите во градот. Преткарневалските свечености во Рио официјално започнаа на 17 јануари и ќе траат до 22 февруари.

Организаторите очекуваат дури 458 улични паради во различни делови од градот, кои би можеле да привлечат повеќе од шест милиони посетители. Паралелно со тоа, традиционалното годишно натпреварување на школите на самба ќе започне со спектакуларни паради во прочуениот Самбадром.

Преткарневалските забави се одржуваат со недели, па дури и месеци пред официјалниот карневал, а нивната популарност расте од година во година. Во последно време, тие привлекуваат дури и поголем број посетители од главниот карневалски настан, станувајќи препознатлив симбол на карневалскиот дух на Рио.