На денешен ден, 24 август 2017 година фудбалерите на Вардар испишаа историја со влез во групите на Лига Европа елиминирајќи го Фенербахче во плеј-офот.

„Црвено-црните“ тогаш предводени од тренерот Чедомир Јаневски пред точно четири години на стадионот „Шукру Сарачоглу“ во Истанбул со 1:2 триумфираа над турскиот гигант.

Во првиот меч со 2:0 го совлада истиот противник и со вкупни 4:1 стана првата македонска екипа од независноста на нашата земја што успеала да влезе во групна фаза од УЕФА натпреварувањата.

По заминувањето на Сергеј Самсоненко, клубот влезе во големи финансиски проблеми, со долгови кон играчите. Рускиот бизнисмен најави во неколку наврати дека финансирањето на клубот претставува голем товар и дека истиот е многу тешко да се издржи.

Сето тоа влијаеше и врз резултатите на екипата која падна во понизок ранг и годинава ќе игра во Втората лига – Запад. В среда започнува новата сезона, Вардар во првото коло гостува на Градскиот стадион во Дебар против ФК Кораби и со амбиции оваа сезона да се врати во елитата.

Пред еден месец градоначалникот на град Скопје, Петре Шилегов заедно на прес конференција со сопственикот на Блу Скај инвесмент (Blue sky investments), Слободан Крстевски и Самоил Симев, поранешниот директор на ФК Вардар, го најави преземањето на фудбалскиот клуб Вардар од компанијата Блу Скај.