Најмалку 23 лица загинаа во Мексико откако обилни дождови го зафатија поголемиот дел од земјата од четврток наваму, соопштија локалните власти, објави nzherald.co.nz.

Според Националната агенција за цивилна заштита, врнежите се поројни особено во Веракруз, Керетаро, Идалго и во Сан Луис Потоси.

Во државата Идалго загинале 16 лица, а околу илјада домови се поплавени. Во државата Пуебла се пријавени пет жртви, 11 исчезнати и 80.000 погодени лица. Во Керетаро загинало едно дете, а во Веракруз – полицаец.

„Работиме на тоа да им помогнеме на жителите, да ги расчистиме патиштата и да ја вратиме струјата“, изјави претседателката Клаудија Шеинбаум.

Тропската бура „Рејмонд“ и ураганот „Присила“ го погодија западниот дел на земјата, при што „Присила“ ослабна по преминот во категорија 2 на Сафир-Симпсоновата скала, соопшти Американскиот национален центар за урагани.

Во Мексиканскиот Залив, систем со низок притисок создаде големо подрачје со грмежи и поројни дождови. Мексико редовно се соочува со урагани на двата брега од мај до ноември.