Три натпревари се одиграа во рамките од 10 коло во италијанската Серија А, составот на Јувентус повторно ги разочара своите навивачи откако загуби дома од Сасуоло со 1:2.

За составот на Алегри титулата оваа сезона делува како „научна фантастика“, моментно заостанува дури 13 бодови зад водечкиот Милан.

После првото полувреме водеше гостинот на стадионот во Торино со голот на Фратеси од 44 минута, израмни МекКени за „Старата дама“ во 76 минута, а конечниот епилог го постави Лопез (90+4`).

Македонскиот напаѓач Илија Несторовски откако се врати од повредата втор меч по ред се наоѓа на клупата за резервни играчи, но и овојпат не доби шанса за настап.

Неговиот Удинезе одигра нерешено 1:1 со Верона, тоа е веќе четврти натпревар по ред во кој фудбалерите на Готи доаѓаат до реми.

Аталанта славеше со 1:3 кај Сампдорија, па така моментно во генералниот пласман во шампионатот води Милан со 28 бодови, пред Наполи (25) и Интер (18), Аталанта е четвртопласирана со 18, следуваат Рома (16) и Фиорентина (15), на седмото место е Јувентус со 15, по 14 Лацио и Сасуоло…