Саутемптон приреди вистинска сензација во ФА Купот, елиминирајќи го фаворизираниот Арсенал со триумф од 2-1.

Домаќините влегоа поенергично во мечот и рано ја наметнаа својата игра, што резултираше со водство во првиот дел. Рос Стјуарт ја искористи грешката во одбраната на „топџиите“ и донесе предност од 1-0.

Во второто полувреме, Арсенал заигра поагресивно и почна да создава шанси. Тренерот Микел Артета освежи со неколку измени, а една од нив веднаш вроди со плод, Виктор Ѓокереш во 68. минута погоди за 1-1 и ја врати неизвесноста.

Кога веќе се насетуваа продолженија, Саутемптон го зададе решавачкиот удар. Во самиот финиш, Шеа Чарлс постигна гол вреден победа од 2-1 и пласман во полуфиналето, предизвикувајќи ерупција од воодушевување на трибините.

Претходно денеска место во полуфиналето обезбедија Челси кој со 7-0 го совлада Порт Вејл, додека Манчестер сити со 4-0 беше подобар од Ливерпул.