ВИДЕО | Сарачини: Луѓето почнаа да ги избегнуваат и медиумите оти содржините им се вознемирувачки и конфронтирачки
Внатрешнополитичките рефлексии водат во насока на зголемување на говорот на омраза и тоа не само на социјалните медиуми.
-Ситуацијата станува сѐ потешка, повознемирувачка и позагрижувачка. Постои култура на неказнивост на говорот на омраза. Пред неколку дена имаше дезинформација дека сега допрва ќе почнел да се казнува говорот на омраза на социјалните мрежи. Тоа не е точноо затоа што говор на омраза преку компјутерски системи е кривично дело одамна, но огромен дел од овој говор на омраза досега не бил казнуван со ретки исклучоци. Тоа не е работа што останува во виртуелниот свет, говорот на омраза се пренесува во реалниот свет, вели Петрит Сарачини од Институтот за медиуми и анализи за Утрински брифинг.
Тој додава дека онаму каде што има функционални системи говорот на омраза се казнува. Правдата треба постојано и конзистентно да се спроведува. Едно истражување на Ројтерс вели дека публиката бега од официјалните медиуми. Причината за тоа е што инфомациите што ги читаат ги вознемируваат и ги водат понатаму во конфронтација со другите луѓе, објаснува Сарачини и додава дека и медиумите треба да внимаваат на својот израз и објави.
-Има и многу држави во западниот свет и на Балканот, а особено тука каде различни етнички заедници се конфронтираат и меѓусебно се осудуваат, вели Сарачини.
Според Сарачини, јадрото што создава такви содржини се неколку илјади и тие се поврзани со партиите и имаат за цел да создаваат лажна слика и конфронтација. Потоа нивните содржини на социјалните мрежи се преобјавуваат од одредени портали, па повторно се враќаат како споделувања на социјалните мрежи, го објаснува Сарачини системот на ширење на говор на омраза.
-Пропагандата која е поврзана со големите светски случувања исто така навлегува преку социјалните медиуми и има влијание и поттикнува говор на омраза. Оваа пропаганда успева да влијае на перцепцијата на граѓаните. На граѓаните им е многу тешко да ја најдат вистината во тоа море од информации. Сега е дојдено време на заситување, а граѓаните ќе почнат да ги бараат медиумите кои работат професионално, вели Сарачини.
