Во сцена што совршено ја илустрира денешна Русија и положбата на Руската православна црква во општеството, патријархот на РПЦ, Кирил, како да е во предизборна кампања, посети државна фабрика за камиони „КАМАЗ“ во Татарстан во јужниот дел од државата, при што седна и да го „проба“ камионот од последната генерација на рускиот производител.

Посетата се случи минатата недела, а на патријархот московски и на цела Русија, раководните луѓе во фабриката му ја претставиле најсовремената технолошка линија за производство на тешки возила, пренесе „Политика“. По тест-возењето, патријархот ја пофалил удобноста и техничката софистицираност на камионот.

Генералниот директор на компанијата, Сергеј Когогин, заедно со челниците на Република Татарстан му ги претставиле на црковениот великодостојник и другите нови производи: електрични автобуси, специјализирани товарни возила и камиони за отпад. „КАМАЗ“ произведува околу 43.000 камиони и други товарни возила годишно. Компанијата е во мнозинска државна сопственост – најголем акционер е државниот холдинг „Ростек“ со 47% од акциите, додека околу 23% се под контрола на компанијата „Автоинвест лимитед“, регистрирана на Кипар, чиишто сопственици не се откриваат во јавноста (но, се смета дека зад неа стојат олигарси блиски до власта на Владимир Путин).

Компанијата ѝ подарила на Руската православна црква приградски автобус КАМАЗ 5222, кој ќе се користи за потребите на свештенството и верниците. Патријархот ја благослови фабриката со икона на Казанската Богородица, симбол на духовна заштита и благослов за сите вработени.

Покрај ова, како што јавуваат руските медиуми, патријархот Кирил рекол и дека „технолошкиот напредок и духовната стабилност треба да одат рака под рака“.