Русија испорача нуклеарна муниција во теренски складишта во Белорусија како дел од големи нуклеарни вежби, соопштија денеска министерствата за одбрана во Москва и во Минск.

Тие објавија и, како што наведоа, „видеодоказ“ — снимка на која се гледаат воени возила како влегуваат во шумска област на непозната локација и ракети што се товараат на лансери.

„Искандер-М“, мобилен ракетен систем со наведувани ракети, кој НАТО го означува како „СС-26 Стоун“, е наменет да го замени советскиот „Скад“. Наведуваните ракети на „Искандер-М“ имаат дострел до 500 километри и можат да носат конвенционални или нуклеарни боеви глави.

Russia has moved nuclear warheads to Belarus as part of joint “military exercises.”

The Russian Ministry of Defence said that troops will practice loading the Iskander-M missile system with nuclear-capable warheads, as well as transporting and preparing them for launches. pic.twitter.com/pSWYmAnZXl

— Roman Sheremeta 🇺🇸🇺🇦 (@rshereme) May 21, 2026

Белоруското Министерство за одбрана соопшти дека видеото ја прикажува „испораката на нуклеарна муниција до теренски складишни точки во оперативната зона на ракетна единица во Република Белорусија, како дел од воени вежби“.

Тридневните нуклеарни вежби, кои почнаа завчера, се одржуваат низ Русија и Белорусија во време кога балтичките држави се вознемирени од повторени инциденти со дронови.

Страв во Литванија поради дронови кај границата со Белорусија — жителите добија повик да се засолнат, претседателот и премиерката беа евакуирани

Руското Министерство за одбрана завчера соопшти дека вежбите, кои траат до денеска, вклучуваат 64.000 војници и 7.800 парчиња воена опрема, меѓу кои повеќе од 200 ракетни лансери, над 140 беспилотни летала, 73 површински бродови и 13 подморници, од кои осум се стратешки подморници способни да носат ракети.

Путин и Лукашенко учествуваа преку видеоврска

Путин и Лукашенко првпат директно учествуваа преку видеоврска во заедничката руско-белоруска вежба на нуклеарните сили.

Путин рече дека нуклеарното оружје останува „крајна и исклучителна мерка“ за национална безбедност, но нагласи дека нуклеарната тријада треба да биде гаранција за суверенитетот на сојузот меѓу Русија и Белорусија.

Лукашенко рече дека вежбите се одбранбени и дека Москва и Минск „никому не се закануваат“.

„Лукашенко ги загрозува животите на Белорусите“

Белоруската опозициска лидерка Светлана Тихановска го обвини авторитарниот лидер Александар Лукашенко дека „уште еднаш ги става животите на Белорусите во ризик“.

Таа рече дека Лукашенко „чекор по чекор“ ја вовлекува земјата во „нуклеарна уцена“ — со отстранувањето на ненуклеарниот статус од законите на земјата, распоредувањето нуклеарно оружје и ракетниот систем „Орешник“, а сега и со заедничките нуклеарни вежби со Русија.

„Денес Русија отворено вели дека нејзиното оружје е стационирано на белоруска територија. А контролата врз него ќе остане во Москва“, напиша Тихановска на „Икс“.

Украинската служба за безбедност СБУ денеска соопшти дека, како одговор на вежбите, Киев ги засилува безбедносните мерки во северните региони за да спречи руски и белоруски сили да се инфилтрираат во пограничните области и да извршуваат „саботажни и терористички акти“.

Украинскиот претседател Володимир Зеленски во своето вечерно обраќање вчера рече дека на состанок со највисоките воени команданти разговарал за можна руска офанзива во северните региони на Украина, вклучително и во Киев и во Чернихив. Пред една недела тој предупреди дека „Русија се обидува подлабоко да ја вовлече Белорусија во војната во Украина и дека разгледува планови за напад врз северот на Украина или врз НАТО-членка од белоруска територија“.

Русија планира да нападне од Белорусија, целта е Украина или НАТО-членка, тврди Зеленски