Украинскиот претседател Володимир Зеленски денеска изјави дека Русија се обидува подлабоко да ја вовлече Белорусија во војната во Украина и дека разгледува планови за напад врз северот на Украина или врз НАТО-членка од белоруска територија, објави „Ројтерс“.

„Продолжуваме да ги документираме обидите на Русија да ја вовлече Белорусија подлабоко во војната против Украина“, напиша Зеленски на „Телеграм“, по средбата со воени и разузнавачки претставници.

Тој рече дека Украина знае за дополнителни контакти меѓу Русија и белорускиот претседател Александар Лукашенко, чија цел е да го убедат да се приклучи на „нови руски агресивни операции“.

„Русија разгледува планови за операции јужно и северно од белоруска територија — или против правецот Чернихив-Киев во Украина или против една од земјите на НАТО директно од територијата на Белорусија“, рече тој, без да даде дополнителни детали.

ВИДЕО | Украина изврши масовен дронски напад врз Кремљ – се запали една од најголемите руски рафинерии

Белорусија се граничи со Украина на југ, а со членките на НАТО — Полска, Литванија и Латвија — на север и запад.

Од Москва или од Минск немаше непосредна реакција на коментарите на Зеленски. Москва не ги открива своите воени планови во Украина, кои се класифицирани како државна тајна.

Лукашенко, еден од најблиските сојузници на рускиот претседател Владимир Путин, дозволи неговата територија да биде користена за дел од руската инвазија врз помалиот сосед во февруари 2022 година, иако не испрати белоруски војници да се борат таму.

Минск оттогаш се согласи на своја територија да распореди руско тактичко нуклеарно оружје и хиперсонични ракети „Орешник“.

Зеленски минатиот месец изјави дека Украина има разузнавачки информации оти Русија прави подготовки што покажуваат дека повторно ќе се обиде да ја вовлече Белорусија во војната, нагласувајќи дека „Украина несомнено ќе се брани ако Лукашенко донесе погрешна одлука и реши да ја поддржи оваа руска намера“.

Билансот на мртви од руските напади на Киев се искачи на 24, од кои три се деца