ВИДЕО | Позитива на денот: Кијану Ривс галеше кутриња среде емисија
Актерот Кијану Ривс неодамна гостуваше во емисијата „The Tonight Show“ на комичарот Џими Фелон, како дел од промоцијата на новото продолжение на филмската франшиза „John Wick“ – „John Wick: Chapter 4“.
Ривс е познат по својата неверојатна харизма, па неговото симпатично учество во „Квизот со кутриња“, кој беше дел од емисијата, е уште еден доказ за тоа зошто тој е едно од најдрагите актерски имиња на голем број луѓе ширум светот.
Правилата на квизот беа прилично едноставни – Кијану Ривс и Џими Фелон одговараа на прашања, еден по друг, а за секој точен одговор тие добиваа по едно преслатко кутре од расата златен ретривер за галење. Но, за секој неточен одговор – им беше одземано по едно кутре, кое го добиваше опонентот.
На крајот од квизот, Кијану победи со дури шест кучиња во неговиот скут и шеговито изјави: „Кој е кралот на кутрињата? Јас сум кралот на кутрињата“.
Дефинитивно, според многумина, ова е еден од најслатките телевизиски моменти во последно време.