Најдобрата македонска тенисерка Лина Ѓорческа испиша нова страница во историјата на македонскиот тенис, откако за првпат во својата кариера обезбеди пласман во главниот жреб на Вимблдон.

Во последното квалификациско коло, Ѓорческа одигра извонреден натпревар и убедливо ја совлада Италијанката Бронзети, која беше фаворит пред мечот и моментално се наоѓа на 127. место на ВТА-листата.

Иако натпреварот започна со брејк за противничката уште во првиот гем, македонската тенисерка брзо ја презеде контролата. Таа одговори со серија од шест последователни гема и со убедливи 6-1 го освои првиот сет.

Во вториот дел од мечот Ѓорческа продолжи со сигурна и концентрирана игра. Не му дозволи на противникот да ѝ го одземе сервисот, а со уште еден убедлив сет од 6-2 го завери најголемиот успех во својата кариера.

Со овој резултат, Ѓорческа не само што ќе дебитира на главниот турнир на најпрестижниот тениски грен-слем на тревна подлога, туку ќе стане и првиот македонски тенисер или тенисерка што ќе настапи во сингл-конкуренција на главен жреб на еден грен-слем турнир.