Научниците открија нов вид на октопод во длабоките води околу архипелагот Галапагос, која веднаш го привлече вниманието поради својата необична појава — мала, сина и „како од цртан филм“, пренесува „Саенс дејли“.

Видот, именуван Microeledone galapagensis, првпат бил забележан во 2015 година за време на длабокоморска експедиција во близина на островот Дарвин, на северниот дел од архипелагот. Истражувачите со помош на подводно возило забележале мал октопод со впечатлива сина боја на длабочина од околу 1.773 метри.

На снимките од мисијата може да се слушнат изненадените реакции на научниците, кои во моментот извикале дека животното е „мало“ и „сино“.

Во текот на експедицијата биле забележани уште два примероци, а една женка била пронајдена на голема длабочина, по што примероците биле испратени за анализа во Природонаучниот музеј „Филд“ во Чикаго.

Главната авторка на студијата, научничката Џенет Војт, изјавила дека веднаш знаела дека станува збор за нешто посебно и дека никогаш порано не видела сличен организам. Според научниот труд објавен во списанието „Зоотакса“, октоподот е мал, збиен, со кратки пипци, мазна кожа и специфична градба што го издвојува од познатите видови.

Бидејќи бил достапен само еден целосен примерок, научниците не сакале да го уништат со класично дисектирање, па наместо тоа користеле современа технологија — компјутерска томографија — со која добиле детални тродимензионални слики од внатрешната и надворешната структура на животното.

Овие анализи овозможиле потврда дека се работи за нов вид, како и подобро разбирање на неговата анатомија и поврзаност со други хоботници.

Истражувачите нагласуваат дека океаните се сè уште недоволно истражени и дека секое ново откритие, како овој мал син октопод, помага подобро да се разберат длабокоморските екосистеми и потребата од нивна заштита.