Четворица луѓе загинаа по второто пукање во училиште во Турција во рок од два дена. Ученик застрелал најмалку четири лица, вклучувајќи и соученици, а ранил најмалку 20 други во средното училиштете „Ајсер Чалик“ во Караманмараш, објави Ројтерс.

Според гувернерот Мукерем Унлуер, досега е потврдено дека се мртви тројца ученици и еден наставник.

„Ученикот напаѓач бил во осмо одделение и ги сокрил оружјата на својот татко во ранец за да го изврши нападот“, посочи гувернерот.

Според Ројтерс, напаѓачот загинал во нападот.

Снимки од местото на настанот покажуваат како ученици бегаат од училиштето, а на други снимки се гледа како пристигнуваат амбулантни возила, додека полицијата и луѓето се собрани пред влезот.

Министерот за правда Акин Гурлек на платформата X објави дека е покрената истрага за нападот.

Вчера, поранешен ученик отвори оган во училиште во југоисточната провинција Шанлиурфа, ранувајќи најмалку 16 лица, вклучувајќи ученици и наставници, пред да се самоубие.

ВИДЕО | Хорор во турско училиште: поранешен ученик рани 16 луѓе и се самоуби