Невролог предупреди дека земањето преголеми количини на еден вообичаен витамин може да доведе до оштетување на нервите и состојба позната како периферна невропатија. Лекарот истакнува дека прекумерните дози можат да станат „токсични“ и да ги оштетат сензорните неврони, пишува британски „Мирор“.

На нашето тело за оптимално функционирање му е потребна низа витамини и минерали.. Иако повеќето потреби ги задоволуваме со здрава и урамнотежена исхрана, на некои луѓе им се потребни секојдневни додатоци во исхраната. Но, нивната употреба не е без ризици за здравјето, како што предупредил во видеото на социјалната мрежа Тикток неврологот д-р Баибинг Чен, попознат како д-р Бинг.

Витамини што можат да бидат токсични

Доктор Чен објаснил дека одредени витамини можат да бидат штетни во прекумерни количини.

– Многумина мислат дека витамините, бидејќи се природни и достапни без рецепт, не можат да наштетат, но тоа не е сосема точно – рекол тој.

Некои витамини секако можат да бидат токсични. На пример, витамините А, Д, Е и К. Станува збор за витамини растворливи во масти кои можат да се наталожат во телото. Дури ниту витамините растворливи во вода, како што се витамините Б и Ц, за кои се смета дека едноставно се излачуваат преку урината, не се секогаш безопасни.“

Тој особено го истакнал витаминот Б6, познат и како пиридоксин. Витаминот Б6 е клучен за искористување и складирање на енергијата од протеините и јаглехидратите и овозможува производство на хемоглобинот, супстанција во црвените крвни зрнца што транспортира кислород низ целото тело. Природно се наоѓа во свинското месо, живината, кикиритките, сојата, овесот и бананите.

– Витаминот што ги изненадува луѓето е Б6 и со него навистина можете да се предозирате. Како невролог, тоа го видов неколкупати. Во високи нивоа Б6 станува токсичен, го нарушува нормалното праќање сигнали помеѓу невроните и може претерано да ги стимулира и оштети сензорните неврони, што доведува до оштетување на нервните влакна – објаснил д-р Бинг.

@doctor.bing Vitamin toxicity is rare but they do exist. One that surprises people is vitamin B6 #tiktoklearningcampaign #learnontiktok #brain #science #neuroscience ♬ original sound – Dr. Bing, MD MPH

Ризикот не произлегува од една голема доза

Последица од тоа може да биде периферна невропатија.

– Поради ова пациентите развиваат симптоми како што се вкочанетост, трнење, печење, болка и проблеми со рамнотежата бидејќи мозокот прима искривени или нецелосни сензорни информации – објаснил тој.

Меѓутоа, ризикот не произлегува од една голема доза.

– Најголемиот проблем не е земањето огромна доза еднаш, туку кумулативниот внес со текот на времето. Имав млад пациент кој секојдневно земал мултивитамин, енергетски пијалак, додаток во исхраната против стрес и додаток за спиење. Ниеден од тие производи сам по себе не содржел екстремни дози, но сите имале витамин Б6, а тој не го знаел тоа. На крајот разви невропатија – нагласил неврологот.

– Дури и по прекинувањето на земањето, закрепнувањето не мора секогаш да биде целосно. Да се разбереме, не сум против додатоците во исхраната. Ги препорачувам на пациентите кога за тоа постои медицинска потреба, а и самиот ги земам. Но, пристапот мора да биде прилагоден на поединецот. Мора да бидеме паметни и да се потпираме на доказите – заклучил неврологот.