Државата ни даде нула денари, нè оставија сами да се бориме за најосновните работи како да бараме услуга, наместо правда, вели Розета, сестра на Јорданчо Џамов кој загина во трагедијата во кабарето „Пулс“ лани, на 16 март.

„Слободен печат“ беше на гробиштата во Кочани во пресрет на годишнината на трагедијата. Џамов не успеал да се спаси вечерта, неговото семејство го барало по сите болници, а тој бил во Кочани. Неговата сестра вели дека во оваа година добиле само добро спакувани ветувања, а реалната поддршка ја нема.

-Институционално се слушаат само убаво спакувани ветувања, но вистинската реална поддршка ја нема. Кога ќе изгубиш некој близок, очекуваш државата да застане зад тебе, но го покажа најминималното чувство на одговорност, нè оставија сами да се бориме за најосновните работи, како да бараме услуга, а не правда. Тоа чувство дека си оставен сам беше втор удар по трагедијата што ни се случи – вели Розета.

Таа вели дека уште нема официјален одговор од власта на нивните барања за системска помош на семејствата на жртвите. Во ваква атмосфера таа не очекува ништо од власта.

-Што да очекуваме од власта? Комеморација на државно ниво не направија, еве сега ќе правеле кога ќе правиме и ние во Кочани. Се покажаа мислам – додава таа.

Камера: Методи Здравев

ВИДЕО | Пред трагедијата си ја обнови опремата, таа не изгоре, а тој не ни се врати – мајката на диџејот од „Пулс“ за „Слободен печат“