Манчестер сити остана без еден трофеј сезонава во Англија, играчите на Пеп Гвардиола се елиминирани уште во 1/16 финалето во Лига купот од Њукасл кој славеше со 1:0. Единствениот погодок на мечот на „Ст. Џејмс Парк“ беше шведскиот интернационалец Александр Исак во 53 минута, асистент беше Жоелингтон.

Во осминафиналето од ова натпреварување се пласираа уште Евертон, Блекбурн, Борнмут, Арсенал, Челси, Фулам, Вест хем и Ливерпул.

Арсенал како гостин го елиминираше Брентфорд со 1:0, победата ја донесе Нелсон во осмата минута од мечот.

Челси сезонава игра „топло-ладно“ во сите натпреварувања, во Премиер лигата не му оди најдобри, но затоа тимот на Маурисио Покетино продолжува успешно во Лига купот. Лондонските „сини“ пред своите навивачи на „Стемфорд Бриџ“ во Лондон со 1:0 триумфираа над Брајтон. Триумфот го обезбеди Џексон во 51 минута по асистенцијата на Палмер.

Лестер водеше од третата минута со голот на МекАтир по првото полувреме на „Енфилд“ против Ливерпул. Но, „црвените“ направија целосен пресврт во вториот дел, најпрвин израмни Гакпо во 48 минута, за 2:1 се погрижи Шобошлаи (70`), а конечниот епилог го постави Диого Жота (89`).

Претходно пласман во следната рунда обезбедија и екипите на Мидлсбро, Ексетер сити, Ипсвич таун, Мансфилд тајн, Порт Вејл, Барнли и Манчестер јунајтед.