Кубански активисти денеска дефилираа со велосипеди и со електрични трицикли по шеталиштето Малекон во Хавана, придружувани од кубанскиот претседател Мигел Диас-Канел, како знак на пркос во време кога САД се обидуваат да го остават островот без гориво, објави „Ројтерс“.

Учесниците во караванот, организиран од владата, поминаа покрај Амбасадата на САД во кубанската престолнина, а на нивните возила беа истакнати знамиња и транспаренти против санкциите што ѝ ги воведе на земјата администрацијата на претседателот Доналд Трамп.

Собирот се одржа еден ден откако главниот кубански дипломат во Вашингтон јавно ја повика американската влада да помогне во обновата на осакатената кубанска економија, како дел од тековните преговори што сè уште не дале резултати.

Учесниците на собирот изјавија дека се за разговори со САД, но побараа почит кон Куба.

„Верувам дека е можен вистински дијалог меѓу двете влади, но мора да се почитуваат меѓународното право и автономијата на нашата земја“, изјави студентка по право од Хавана и учесничка на настанот.

Диас-Канел не се обрати за време на настанот.

Кубанската влада честопати организира големи собири пред Амбасадата на САД. Овој караван беше помал и подискретен, отежнат од недостигот на гориво што ја парализира мобилноста и го наруши јавниот превоз.

Танкер под руско знаме пристигна во Куба оваа недела и истовари 700.000 барели сурова нафта, што ветува одредено олеснување во наредните недели, a Русија планира да испрати и втор брод што ќе носи нафта во Куба, информира рускиот министер за енергетика Сергеј Цивилев.

Администрацијата на Трамп, која се закани дека ќе воведе царини за земјите што извезуваат нафта во Куба и експлицитно го забрани увозот на руска нафта, соопшти дека му дозволила на танкерот под руско знаме да се закотви во кубанското пристаниште Матансас од хуманитарни причини.

Трамп: Куба е следна, но преправајте се дека не го кажав тоа