На денешен ден пред 28 години, еден од најголемите југословенски кошаркари на сите времиња, Дражен Петровиќ, загина во сообраќајна несреќа на автопатот Нирнберг-Минхен.

„Кошаркарскиот Моцарт“ трагично почина на врвот на својата слава, на 29-годишна возраст, во близина на Денкендорф, враќајќи се од Полска, каде играше за Хрватска против Словенија во квалификациите за Европското првенство.

Роден на 22 октомври 1964 година во Шибеник, а на само 15 години играше за првиот тим на Шибеник. Подоцна се пресели во Цибона, со која доминираше во Југославија и Европа (двапати европски шампион).

Потоа играше за Реал една сезона (1988-1989), пред да замине во најсилната лига во светот, НБА, прво во Портланд трејл блејзерс, а подоцна и во Њу Џерси нетс, каде целосно го смени имиџот на европските играчи и им го олесни патувањето во САД.

Дебитираше за репрезентацијата на Југославија на Олимписките игри во Лос Анџелес, каде освои бронза.

Истиот медал и МВП-награда ги освои на Светското првенство во Шпанија во 1986 година, како и на Европското првенство во Грција во 1987 година.

Освои сребро на Олимписките игри во Сеул, а најголемиот успех го постигна на Европското првенство во Загреб во 1989 година и на СП следната година во Аргентина освојувајќи златни медали, титула МВП и најдобар стрелец.

По распадот на СФРЈ, тој ја предводеше Хрватска до сребро на Олимписките игри во Барселона во 1992 година и славното финале со оригиналниот американски „Дрим-тим“.