Ерик Клептон без сомнение е еден од најдобрите гитаристи на сите времиња. Тој отсекогаш бил исклучително сигурен во себе и во својот стил на свирење. Токму таа сигурност го довела до тоа точно да знае кога во некој бенд дал сè што можел и кога е време да си замине и да побара луѓе со иста визија.

Така преминал од „The Yardbirds“ во „Cream“, а потоа ја продолжил соло-кариерата, воден од јасна увереност во музиката што ја сака. Истата сигурност ја има и кога станува збор за тоа кој го инспирира, пренесува „Фар аут магазин“.

Клептон препознава талент веднаш штом ќе го слушне, има слух за тоа, што го прави еден гитарист навистина добар. Познато е дека за време на еден од првите настапи на Џими Хендрикс во Велика Британија, Клептон го поканил на бината да импровизираат заедно. Кога настапот завршил, Ерик го напуштил клубот, а на прашањето каде оди, кратко одговорил: „Да вежбам“.

Таа способност да препознае уникатен талент во свирењето гитара ја обликувала и неговата решителност како музичар. И затоа, иако музиката е целосно субјективна и секој има право на свое мислење за тоа што е голем талент, кога Клептон ќе каже дека некој е најдобриот жив гитарист, голема е шансата да е во право.

Се зборувало дека ако го пресечеш Бади Гај, од него би течела сина крв. Гај е еден од највпечатливите блуз-музичари во светот, а неговата гитарска техника инспирирала генерации музичари. Клептон го пофали гитаристот кога во 2005 година беше примен во Рокенрол-куќата на славните.

Неговите зборови беа едноставни, но кога некој ти значи многу и кога неговата музика зборува сама за себе, нема потреба од долги говори. Во своето обраќање Клептон јасно и директно рече:

„Бади Гај е, без никакво сомнение, најдобриот гитарист на светот“.

Иако од таа церемонија поминаа речиси дваесет години, оваа изјава и денес има иста тежина како и тогаш.

Гај ја свиреше гитарата исто како што дишеше, природно. Имаше суров и моќен стил на свирење кој постави стандарди во блузот. Срцето и душата на музиката што ја сакаше беа присутни во секоја отсвирена нота, до тој степен што ниту еден голем гитарист што дојде по него не пропушти на некаков начин да му се заблагодари за влијанието врз својата кариера.

Карлос Сантана, Џими Хендрикс, Џеф Бек, Стиви Реј Вон и, секако, Ерик Клептон – сите со восхит зборуваа за Бади Гај.

Сите сакаат можност да ја делат бината со него, а музичарот и денес влијае на новите генерации гитаристи. Токму затоа, зборовите на Клептон силно одекнаа во музичкиот свет кога го нарече Бади Гај еден од најдобрите. Блузот му тече низ вените.

Дали Клептон сакал и други гитаристи?

Секако. Со текот на годините, и покрај своите контроверзии како јавна личност, Клептон великодушно фалеше и други изведувачи. Често ги истакнуваше талентите на гитаристи како Принс, Двејн Олман и, се разбира, неговиот пријател Џими Хендрикс.

Сепак, тој именуваше и музичари како Џон Маер како исклучително талентирани. Но, се чини дека никој не успеал да се доближи до титулата „најдобар жив гитарист“ ако не се вика Бади Гај. Со оглед на тоа колку неговата музика и денес е силна и влијателна, како и фактот дека на 89 години сè уште свири и настапува, изгледа дека таа круна ќе ја носи уште долго време.