Пескара и официјално се пресели во Серија Ц, откако тимот не успеа да обезбеди опстанок во драматичната завршница од сезоната.

Во клучниот натпревар, Пескара одигра 1-1 против Специја пред домашната публика, резултат што значеше крај на надежите за останување во второлигашкото друштво. Разочарувањето кај навивачите беше огромно, а по последниот судиски свиреж незадоволството го изразија и со пиротехника пред стадионот.

Под жестоки критики се најде и ветеранот Лоренцо Инсиње, кој во претходното коло не успеа да реализира пенал против Падова, момент што многумина го посочија како еден од клучните во борбата за опстанок.

Искусниот офанзивец се врати во Пескара на почетокот на годинава, повторно облекувајќи го дресот на клубот во кој блескаше во сезоната 2011/2012 како позајмен фудбалер од Наполи. Сепак, по испаѓањето во понизок ранг, сè поизвесно е дека неговата втора епизода во клубот ќе биде краткотрајна.