Кирил Лазаров го одигра својот најефикасен натпревар оваа сезона, но неговите 10 голови не беа доволни да се избегне поразот на гостувањето кај Лимож, кој е хит во досегашниот тек од шампионатот.

Нашиот десен бек повторно блескаше во дресот на Нант, а еден од неговите погодоци се најде во изборот за најубав гол на шестото коло во Франција.

Македонскиот репрезентативец уште еднаш покажа дека и на 40 години има „топ во раката“, постигнувајќи гол од 10 метри.

Потсетување, Лазаров се наоѓа на списокот играчи кај селекторот Данило Брестовац за првите натпревари од квалификациите за пласман на Европското првенство.

Првиот меч сениорите ќе го одиграат на 4 ноември (среда) против Финска во Скопје, а вториот против Швајцарија во градот Цуг три дена подоцна.

Пласман на ЕП обезбедуваат првите две репрезентации од сите групи, како и четири најдобро рангирани репрезентации кои ќе завршат на третото место во групата.