Експериментот на Роналд Куман да му даде мал одмор на својот најдобар играч, Лионел Меси со тоа што го остави на клупата за резервни играчи, не се покажа како успешен, но на крајот Барселона славеше на гостувањето кај Бетис со 2:3.

Трите бода и шестата победа по ред за Барселона ги донесе Тринкао со голот во 87. минута, но вистински јунак беше голманот на каталонците, Марк Андре тер Штеген кој го бранеше и невозможното.

Првото полувреме во кое Барселона играше без Меси, помина во знакот на домашните фудбалери кои имаа неколку шанси, но не можеа да го совладаат одличниот Тер Штеген. Така беше се до 38. минута кога одличната контра со гол ја круниса Иглесијас.

Во второто полувреме, Куман мораше да го внесе Меси во игра и тоа вроди со плод во 59. минута кога Аргентинецот погоди за израмнување.
Само десет минути подоцна, Барселона прави пресврт откако топката по лошиот шут на Гризман се одби од несреќниот Руиз и заврши во мрежата. Сепак, дефанзивецот на Бетис се извади за киксот во 75. минута откако по одличниот центаршут на Фекир, со глава погоди за 2:2.

Голот вреден три бода за Барселона беше дело на Тринкао во 87. минута, а каталонскиот тим со оваа победа се израмни со Реал Мадрид на второто место на табелата со 43. бода, седум помалку од лидерот Атлетико Мадрид кој има два натпревари помалку.

Резултати:
Реал Сосиедад – Кадиз 4:1
Атлетик Билбао – Валенсија 1:1
Осасуна – Еибар 2:1
Бетис – Барселона 2:3