Познати се сите учесници во четвртфиналето на Лигата на конференции која ќе продолжи без македонски претставник. АЕК Ларнака загуби и на реваншот во Лондон од Вест хем овојпат со 4:0 и со вкупни 6:0 кипарскиот претставник е елиминиран.

На денешното гостувањето македонскиот интернационалец Иван Тричковски беше на клупата за резервни играчи, но не доби минутажа. За „чеканите“ двапати во листата на стрелците се запиша Боуен, а по еднаш Скамака и Мубама.

Лацио исто така го заврши својот настап во натпреварувањето, римскиот клуб и по вторпат со ист резултат 2:1 загуби на возвратната пресметка во Холандија со АЗ Алкмаар.

Добро започна мечот за „небесно-сини“ со водство од 21 минута преку Фелипе Андерсон, но домаќините направија целосен пресврт. За израмнување се погрижи Карлсон (28`), а истиот играч беше асистент во 62 минута кога стрелаше Павлидис.

После нерешените 1:1 во првиот меч, Андерлехт славеше како гостин кај Виљареал со 0:1, а радост за Белгијците донесе Слимани во 73 минута по асистенцијата на Муриљо.

По минималните 1:0, француската Ница и по вторпат го преслуша Шериф Тираспол овојпат на домашен терен со 3:1. Првите два голови за Ница ги реализираа Лаборд (30`) и Мофи (53`), потоа Молдавците намалија преку Тапсоба, а конечниот епилог го постави Брахими во 79 минута на стадионот „Алијанц Ривиера“.

Покрај АЗ Алкмаар, Ница, Андерлехт и Вест хем, во четвртфиналето на Лигата на конференции се пласираа и Гент, Фиорентина, Лех Познањ и Базел.