МЗТ Скопје Аеродром денеска на гостински терен во Црна Гора од 19.00 часот ќе го игра третиот натпревар оваа сезона во АБА лигата против Будуќност.

Уште еден екстремно тежок меч за „сино-белите“ после стартните два порази од актуелниот шампион во регионалното натпреварување, Црвена звезда (87:67) и Партизан во Скопје (74:92).

Се очекува играчите предводени од тренерот Александар Петровиќ да го дадат максимумот против фаворизираниот противник со повеќекратно поголем буџет.

Адем Мекиќ сè уште е надвор од составот на македонскиот шампион, а сите останати играчи тргнаа на пат кон Подгорица, каде што ќе се обидат да стигнат до првата победа сезонава.

– Пред нас е тежок натпревар против состав кој е меѓу фаворитите за највисок пласман во АБА. Но, нема однапред да се предадеме. Со сите сили ќе се бориме до крајот на мечот и ќе сториме сè за да пробаме да го изненадиме силниот противник – вели кошаркарот на МЗТ, Бојан Величковски.

Средбата ќе биде директно пренесувана на МТВ-3 како и на каналите на регионалната телевизија Арена Спорт.