По триумфот од 38:25 во Скопје, денеска актуелниот македонски шампион Вардар 1961 на реваншот од четвртфиналето во СЕХА-Газпром лигата славеше и во Нови Сад против Војводина овојпат со 32:26.

Војводина подобро го стартуваше мечот стекнувајќи предност од 6:1 по осум минути игра. Србите успешно ја одржуваа предноста, по 15 минути игра на семафорот стоеше 10:5, а на паузата заминаа со водство од 15:11.

Вториот дел целосно му припадна на составот на Владо Недановски кој најпрвин направи серија од 7:1 што беше клучно за преземање на позитивата, минимална од 20:19 во 41 минута од средбата.

Георгиевски и Чувара се погрижија за нешто поголема предност од 24:21, противникот како да го губеше чекорот, во 47 минута по погодокот на Јагуриновски беше 26:22. До самиот крај на дуелот играчите на Недановски рутински ја одработија задачата и така го обезбедија и 10 учество во завршницата на СЕХА.

Кај „црвено-црните“ блескаше Георгиевски со 10 голови, а на спротивната страна за српскиот претставник доминираше Симо Сијан со девет погодоци.

Нашата земја на Фајнал-фор турнирот ќе ја претставува и Еурофарм Пелистер кој претходно го елиминираше Татран Прешов. Ова е третпат Македонија да има два претставници на Ф4, претходно тоа се случи во првите две сезони, кога настапуваа Вардар и Металург.