Вардар прв финалист во Купот
Ракометарите на Вардар ја оправдаа фаворитската улога против Металург и се пласираа во финалето на Купот на Македонија откако славеа со 27:22 над тимот од Автокоманда.
Металург кој игра одлично откако на клупата седи поранешниот репрезентативец, Иван Марковски, добро го започна натпреварот и поведе со 2:0, но во 10. минута Вардар веќе имаше предност од четири голови (6:2.).
Потоа следуваше период на подобра игра на ракометарите на Металург кои успеаја повторно да поведат, овој пат со 10:9 по што следеше исклучување на Хорват кое го искористија „црвено-црните“ со мини серија да обезбедат предност на полувемето (14:12).
Во воведните минути од второто полувреме, вардарци направија серија од 5:0 за предност од седум голови (19:12) и практично ги решија дилемите околу пласманот во финалето.
Најдобар во редовите на Вардар беше Иван Чупиќ со седум постигнати голови, шест даде Јотиќ, додека на голот одличен беше Борко Ристовски со 15 одбранети удари. Во тимот на Металург, Серафимов и Калуѓеровиќ дадоа по шест голови. Во второто полуфинале од 19 часот ќе играат Еурофарм Пелистер и Бутел.