Ван Нистелрој ќе го менува Тен Хаг во Манчестер јунајтед?
Холанѓанецот веќе е во Стручниот штаб на Јунајтед, а на Тен Хаг му оди лошо на стартот на сезонава…
Руд ван Нистелрој ќе го замени Ерик тен Хаг на кормилото на Манчестер јунајтед во скоро време.
Ова се неофицијални информации од Островот, но не е нереално да се остварат.
Ерик тен Хаг се мачи како менаџер на Манчестер јунајтед и од почетокот на сезоната има два пораза во три кола.
Веќе на големо се шпекулира дека Холанѓанецот оди кон излезната врата.
Ван Нистелрој е асистент на својот сонародник во Стручниот штаб на Јунајтед, каде дојде на почетокот на сезонава.
За Ван Нистелрој враќањето на „Театарот на соништата“ по 18 години отсуство е големо задоволство, а ако може да ја преземе диригентската палка од Тен Хаг ќе биде како сон.
Навивачите сигурно гласно би поздравиле ваква одлука. Ван Нистелрој во играчката кариера постигна 95 гола во 150 меча во Премиер лигата за „црвените ѓаволи“, а уште 38 во 47 меча во Лигата на шампионите.
