Македонскиот репрезентативен голман Столе Димитриевски ќе остане дел од Валенсија најмалку до летото 2028 година, откако шпанскиот клуб ја активирал клаузулата за автоматско продолжување на неговиот договор за уште две сезони, пренесуваат шпанските медиуми.

Со ваквиот потег, Валенсија ја потврдува довербата во искусниот чувар на мрежата, кој во текот на сезоната се наметна како едно од најсигурните решенија во тимот. Клубот ќе треба да го исплати предвидениот бонус од претходниот договор, а со тоа и официјално ќе ја обезбеди неговата иднина на „Местаља“.

Според информациите, не биле водени нови преговори меѓу двете страни, бидејќи раководството на клубот ја искористило можноста за еднострано продолжување на соработката. Одлуката била поддржана од тренерот Карлос Корберан и спортскиот сектор, кои го сметаат Димитриевски за важен дел од проектот на Валенсија.

Македонецот пристигна во клубот во 2024 година, а оваа сезона долго време ја имаше улогата на резерва. Сепак, по повредата на првиот голман Јулен Агирезабала, Димитриевски доби шанса која максимално ја искористи, прикажувајќи низа сигурни настапи меѓу стативите.