Австрискиот европратеник Томас Вајц изрази надеж дека по локалните избори ќе бидат „направени потребните уставни измени за вклучување на бугарската заедница во Уставот како малцинство“.

Вајц во изјава за Европската новинска редакција (ЕНР), чиј дел е и Медиумската информативна агенција (МИА), вели дека усвојувањето на уставните измени ќе го отвори патот за вистински почеток на преговорите.

„Земјата сега е опфатена со пристапниот процес, но всушност ги немаме започнато преговорите. Треба да ги започнеме наскоро за да ја одржиме земјата на вистинскиот пат“, вели Вајц.

Според него, македонската влада полека, но сигурно, ги спроведува агендите поврзани со малцинствата, коридорите и безбедносните прашања, со што има одреден напредок, но сепак вели дека засега сè уште недостига вистински пробив за напредок на европскиот пат.

„Северна Македонија се уште е блокирана од Бугарија. За жал, има многу прашања поврзани со идентитетот што го блокираат нејзиниот напредок“, додава Вајц.

Бугарскиот претседател Румен Радев за време на вчерашната средба со претседателот на Унгарија, Тамаш Сујок, повика Унгарија да ја убеди Северна Македонија дека промената на Уставот и европскиот консензус по однос на ова прашање се неотповиклив услов за членство во Европската Унија.

Радев: Ја повикав Унгарија да ги убеди нашите браќа од Македонија на уставните измени