Во рамките на традиционалните крводарителски акции на Црвениот крст на град Скопје и година ќе се реализира крводарителска акција посветена на хуманоста и делото на нашата музичка ѕвезда Тоше Проески, информираат од градскиот Црвен крст.

Годинава, акцијата ќе се одржи в недела, на 25 јануари 2026 година, во холот на Домот на АРМ, во периодот од 9 до 17 часот, а во организацијата се вклучува и  Општинската организација на Црвен крст -Гази Баба, со поддршка на Институтот за трансфузиона медицина.

Оваа крводарителска акција веќе прерасна во препознатлива и традиционална хуманитарна активност во Скопје, која секоја година обединува голем број граѓани, а особено млади луѓе кои во ликот и делото на Тоше Проески препознаваат силен пример за хуманост. Досега, преку овие крводарителски акции се собрани над 6.000 единици крв, при што особено охрабрувачки е големиот број млади и првократни крводарители кои активно се вклучуваат, инспирирани од пораките што Тоше ги пренесуваше, велат од градскиот Црвен крст.