Бугарските власти поднесоа обвиненија против 30-годишен маж и 41-годишна жена за наводно киднапирање и за сексуална трговија со млада девојка, објави „Новините“.

Окружното обвинителство во Стара Загора исто така го товари мажот дека ѝ нанел телесна повреда, откако жртвата, според наводите, се здобила со скршеница на десната рака за време на злоставувањето.

Според истрагата, кривичните дела биле извршени во периодот од 7 до 14 февруари во Пазарџик, Софија и во Стара Загора.

Истражителите сметаат дека младата жена била киднапирана додека пешачела по пат во близина на Пазарџик на 7 февруари, кога двајцата осомничени наводно со сила ја внеле во возило против нејзина волја.

Властите наведуваат дека таа најпрво била однесена во Софија, а потоа префрлена во Стара Загора, каде што наводно била принудена да дава сексуални услуги за пари.

Обвинителството тврди дека таа била постојано носена на различни адреси кај клиенти, додека била држена против својата волја.

Жртвата, според наводите, неколкупати се обидела да побегне, но осомничените ја спречиле.

Таа наводно била подложена на континуирано насилство, била врзувана со кабли, затворана во простории и тепана.

По наводните кривични дела, двајцата осомничени ја напуштиле Бугарија и биле ставени на потерница. Тие биле уапсени во петокот, кога се вратиле во земјата.

На двајцата обвинети, по налог на надлежниот обвинител, им е одреден притвор до 72 часа.

Обвинителството побарало од судот да им биде одредена најстрогата мерка притвор и двајцата да останат во притвор додека трае истрагата.

Ужас во Грција: тинејџер од Албанија силувал девојче, го снимил злоделото