Селекторот на фудбалската репрезентација на Шпанија, Луис де ла Фуенте, изјави дека неговиот тим мора да биде внимателен во претстојното полуфинале на Светското првенство против Франција, да не прави грешки и со тоа да му даде шанса на противникот.

– Ова е исклучително тежок натпревар. Тоа е полуфинале. Веќе реков дека ова може да биде финале на Светското првенство, но од друга страна, натпреварот помеѓу Аргентина и Англија би бил исто така уште едно финале. Ние сме првите четири репрезентации на ранг-листата на ФИФА – рече Де ла Фуенте.

Натпреварот ќе се игра денеска од 21.00 часот на стадионот во Далас, и истиот ќе го суди Иван Бартон од Ел Салвадор.

– Мора да бидеме внимателни, да не правиме грешки, да не му даваме никакви шанси на противникот, да се обидеме да ја контролираме играта колку што е можно повеќе и да бидеме немилосрдни во шеснаесетникот – додаде шпанскиот селектор.

Своите очекувања ги сподели и младата светска фудбалска ѕвезда и играч на Барселона, Ламин Јамал:

– Ова е најважниот натпревар што некогаш ќе го играм. И ми е мило што стигнав до тука. Сите сме навистина возбудени, а јас сум највозбуден. Дефинитивно е најважниот натпревар што некогаш ќе го играм – вели Јамал.