Турската пејачка Ѓулшен е уапсена откако на нејзин концерт кажала шега за турските верски училишта, што полицијата го оцени како „поттикнување омраза и непријателство“, пренесува Ројтерс.

Четириесет и шестгодишната Ѓулшен, чие полно име е Ѓулшен Чолакоглу, била приведена од својот дом во Истанбул, а во моментов таа е во затвор, каде ќе остане до судењето.

Ѓулшен на концертот во Истанбул во април рекла дека „перверзиите“ на еден од нејзините музичари се последица на тоа што тој посетувал верско училиште.

Апсењето на пејачката предизвика дебати на социјалните мрежи.

Во текот на испрашувањето, Ѓулшен ги отфрлила обвинувањата дека ширела омраза и непријателство, велејќи пред судските власти дека „бескрајно ги почитува вредностите и чувствителноста“ на својата земја. Таа се извинила поради навредата, но рекла дека за нејзиниот коментар се фатиле оние кои сакаат да ја продлабочат поларизацијата во земјата.