Руската безбедносна служба (ФСБ) во вторникот соопшти дека уапсила трет човек осомничен за вмешаност во минатонеделниот атентат врз висок функционер на военото разузнавање, Владимир Алексеев, за кој московските власти ја обвинуваат Украина, објави „Москов тајмс“.

Алексеев, генерал-потполковник и прв заменик-директор на руската воена разузнавачка служба ГРУ, бил хоспитализиран откако во петокот наутро бил застрелан повеќепати во стан во Москва. Според медиумските извештаи, тој е свесен, но се наоѓа во критична состојба.

ФСБ соопшти дека најново уапсениот осомничен е Павел Васин, 44-годишниот син на Виктор Васин, кој бил уапсен во Москва кратко по пукањето во Алексеев.

Покрај таткото и синот Васин, ФСБ наведува дека и осомничениот напаѓач, Лјубомир Корба, руски државјанин роден во Украина, бил уапсен во Обединетите Арапски Емирати во саботата и екстрадиран во Русија.

Четврта личност е осомничена за вмешаност во наводниот заговор за атентат, Зинаида Серебрицкаја, која наводно избегала во Украина. Руската полиција издаде потерница по неа.

Според ФСБ, Павел Васин е осомничен дека на својот татко и на Корба им обезбедил возила што биле користени за физичко следење и за преземање оружје од скриено складиште.

Уапсен осомничениот за нападот врз рускиот генерал Алексеев

„Ме регрутираше во име на украинската безбедносна служба СБУ“

Во видео од испрашување објавено од ФСБ, Васин вели дека Корба го регрутирал минатиот септември во име на украинската безбедносна служба СБУ.

„Ги извршував задачите на Корба поврзани со опрема и го превезував каде што ќе ми кажеше“, вели Васин во видеото.

ФСБ тврди и дека помладиот Васин следел уште двајца високи руски воени функционери со цел можни атентати. Неговиот татко, пак, е осомничен дека изнајмил стан за Корба и му обезбедил картички за јавен превоз.

Претходно оваа недела, ФСБ соопшти дека Павел Васин има полско државјанство и дека „учествувал во регрутацијата на својот татко со помош на полските разузнавачки служби“. Полска ги отфрли овие обвинувања, оценувајќи ги како „типична дезинформација“.

Атентатот врз Алексеев е најнов во низата напади во Русија насочени кон високи воени функционери. Од декември 2024 година наваму, тројца генерали биле убиени во Москва или во нејзина близина, при што последното убиство се случило кон крајот на минатата година.

Никој досега не презеде одговорност за пукањето врз Алексеев. Украинскиот министер за надворешни работи Андриј Сибиха ги отфрли обвинувањата дека Киев стои зад нападот и оцени дека станува збор за „внатрешни пресметки во Русија“.

Алексеев е роден во Виницката област во тогашна Советска Украина и по почетокот на руската инвазија врз Украина во 2022 година бил задолжен за разузнавачките операции во Украина, откако претседателот Владимир Путин ја маргинализираше улогата на ФСБ во раните месеци од војната.

ВИДЕО+ФОТО | Руски генерал е убиен во експлозија на автомобил бомба во Москва