Бројот на невработени во Германија во април е намален за 13.000 во споредба со март, но и понатаму е над три милиони, што укажува на стагнација на пазарот на труд, објави денеска Сојузната канцеларија за труд.

На годишно ниво, бројот на невработени е поголем за 77.000 во однос на април 2025 година, додека стапката на невработеност остана непроменета и изнесува 6,4 отсто, пренесува „Виртшафтсвохе“.

Директорката на Сојузната канцеларија за труд, Андреа Налес, оцени дека „пресврт на пазарот на труд сè уште не е на повидок“, додавајќи дека сезонското пролетно закрепнување годинава е послабо отколку порано.

Побарувачката за работна сила покажува знаци на стабилизација, но на ниско ниво. Во април во Германија биле регистрирани 641.000 слободни работни места, што е за околу 5.000 помалку отколку пред една година.

Истовремено, бројот на корисници на паричен надоместок за невработеност пораснал на 1,07 милиони, што е за 93.000 повеќе од минатата година. Бројот на корисници на социјална помош, пак, се намалил за 125.000 и изнесува 3,826 милиони луѓе.

Проблемите се видливи и на пазарот за образование и вработување на младите. Приближно 211.000 млади луѓе и понатаму немаат пракса или работа, додека истовремено има 217.000 непополнети места за обука. Главната причина за тоа е неусогласеноста меѓу квалификациите и локацијата.

Трамп разгледува повлекување на дел од американските сили од Германија