Тренерот и најдобриот играч на Барселона во клинч, војна на зборови меѓу Миротиќ и Јасикевичиус
Кошаркарската сезона во Шпанија заврши со триумф на Реал Мадрид иако во најголем дел од сезоната изгледаше дека ова ќе биде година на Барселона која на крајот испадна најголем губитник и тоа доведе до „војна на зборови“ меѓу тренерот Шарунас Јасикевичиус и најдобриот играч Никола Миротиќ.
Барселона на почетокот од годината триумфира во шпанскиот Куп, а беше најдобра во регуларниот дел од сезоната во Евролигата и шпанската АЦБ лига. Но, и во двете натпреварувања пред нив се испречи Реал Мадрид, „кралевите“ прво ја совладаа Барселона во полуфиналето за фајнал-фор турнирот во Евролигата, а сега во финалето на плеј-офот во шпанскиот шампионат славеше со 3:1 и ја освои 36 титула.
Тренерот Јасикевичиус постојано потенцираше дека неговата екипа нема карактер и дека тоа е причината за поразот од Реал во полуфиналето во Евролигара, а истото го рече и по поразот во финалето на плеј-офот во шпанскиот шампионат. Тие зборови не му се допаднаа на најдобриот играч на Барселона, Никола Миротиќ кој вината ја гледа и тренерот и неговата тактика.
– Направивме се што тренерот бараше од нас, но не одеше. Секогаш се обидуваме да играме како што тој бара од нас, но направивме многу грешки. Тие знаеја кои се нашите силни стрини и успеаја да ги неутрализираат. Оваа сезона според мене е неуспешна. Овој тим е создаден за многу поголеми нешта и моравме да постигнеме повеќе. Целта не е исполнета и ова е неуспех бидејќи станува збор за Барселона – изјави Миротиќ.