Претседателот на САД, Доналд Трамп, во четвртокот изјави дека не ја исклучува можноста за војна со Венецуела, објави „Ен-би-си њуз“.

„Не ја исклучувам, не,“ изјави тој во телефонско интервју за „Ен-би-си њуз“.

Трамп во вторникот нареди „блокада“ на санкционирани нафтени танкери кои влегуваат и излегуваат од Венецуела, со што дополнително го зголеми притисокот врз претседателот на земјата, Николас Мадуро.

САД неодамна запленија и еден нафтен танкер кој бил пресретнат во близина на Венецуела.

ВИДЕО | Најмалку четворица загинати во нов американски напад врз глисер во Пацификот

Кампањата на администрацијата досега резултираше со 28 напади врз чамци, во кои загинаа повеќе од 100 луѓе, вклучително и т.н. „двоен удар“, кој е предмет на конгресна истрага.

Во телефонското интервју, Трамп рече „не дискутирам за тоа“ кога беше прашан дали ги исклучува можните последици што би можеле да доведат до војна.

Но, кога беше дополнително притиснат, тој потврди дека таквата можност постои и најави дополнителни заплени на нафтени танкери. На прашањето за временска рамка, Трамп одговори: „Зависи. Ако се доволно глупави да пловат, ќе пловат назад – директно во некое од нашите пристаништа“.

Трамп одби и да каже дали неговата крајна цел е соборување на Мадуро.

„Тој точно знае што сакам. Тој тоа го знае подобро од кој било друг,“ одговори Трамп.

Признанието на Трамп дека не ја исклучува војната со Венецуела е значајно бидејќи тој долго време се обидуваше да се дистанцира од јастребовското крило на Републиканската партија, а во кампањата во 2024 година ветуваше дека ќе ја држи Америка подалеку од странски конфликти.

Во говорот по изборната победа, Трамп изјави дека „нема да започнува војни, туку ќе ги запира војните“.

Администрацијата тврди дека нападите биле насочени кон наводни нарко-чамци и дека Венецуела ги користи приходите од нафта за финансирање на „нарко-тероризам“.

Трамп тврди дека не му е потребна согласност од Конгресот за да нареди напади врз Венецуела