Финскиот претседател Александар Стуб верува дека може да се постигне договор што истовремено би влијаел на војната во Украина и на енергетската криза во Персискиот Залив.

Според неговата идеја, Европа би можела да понуди воена поддршка за обезбедување на Ормускиот Теснец, клучен поморски пат што Иран го блокираше, а за возврат би побарала од американскиот претседател Доналд Трамп да ѝ даде целосна поддршка на Украина во постигнувањето прифатлив мировен договор со Русија, објави Политико.

Стуб ја слушнал оваа идеја за време на дискусија во институтот „Чатам Хаус“ со седиште во Лондон и ја сметал за многу добра.

„Мислам дека е навистина добра идеја… всушност, мислам дека е одлична идеја“, рече тој, додавајќи дека дополнително ќе ја разгледа со својот тим.

Прашањето за опстанокот на Украина

Иако Финска нема значајни воени капацитети за ангажман во регионот на Ормускиот Теснец, европските претставници стравуваат дека продолжениот конфликт на САД со Иран би можел дополнително да ја загрози одбраната на Украина од Русија.

Зголемувањето на цените на енергијата и можното олеснување на санкциите врз руската нафта ги зголемуваат приходите на Москва, додека американските сили ги трошат ресурсите на Блискиот Исток, оставајќи помалку ресурси за поддршка на Украина.

Трамп неодамна изврши притисок и врз украинскиот претседател Володимир Зеленски да се согласи на договор со Владимир Путин без јасни безбедносни гаранции.

Страв од лош договор за мир

Стуб предупредува дека мировните преговори се приближуваат кон пресвртна точка што би можела да го принуди Киев на неповолен договор, вклучително и можни територијални отстапки кон Русија.

Доколку разговорите не успеат, Европа би можела да остане без американска помош и да биде принудена сама да ја поддржува Украина, разузнавачки, воено и финансиски. Тој нагласи дека нема илузии за своето влијание врз Трамп.

„Ако една од моите десет идеи за Украина помине, ќе ја сметам за успешна – додаде тој.

Негативни последици за Киев

Стуб истакна дека војната во Иран има негативни последици за Украина, првенствено поради порастот на цените на нафтата, што оди во полза на руската економија.

Покрај тоа, конфликтот ги пренасочува системите за воздушна одбрана од украинскиот фронт, додека глобалното внимание сè повеќе се префрла кон Блискиот Исток.

„Се надевам дека мировните преговори за Украина нема да пропаднат како разговорите меѓу Иран и САД. Но, времето ќе покаже“, заклучи Стуб.